ئەمڕۆ پێنجشەممە(٣١ی ئاداری ٢٠٢٢)، رائید بەختیار محەمەد عەبدوڵا وتەبێژى راگەیاندنى هاتووچۆى سلێمانى رایگەیاند،"تابلۆى نێودەوڵەتى سەرانسەرى نیە لە ناو هەرێمى کوردستان و عێراق، چونکە هێشتا لە قۆناغى کارکردندایە و نەگەشتووینەتە ئەو بڕیارەى جێبەجێبکرێت".
ئەو دەشڵێت" رێکەوتنێک دەکرێت لەنێوان وەزارەتى ناوخۆى حکومەتى هەرێم و حکومەتى عێراق، کاتێک ئەم رێکەوتنە تەواوبوو، لەدواى ئەوە تابلۆکە دەستنیشان دەکرێت بۆ سەرانسەرى عێراق و ئەوە دادەنرێت".
رائید بەختیار محەمەد باسی لەوەشکرد" هەرچەندە خواستى زۆر لەسەر تابلۆى نێودەوڵەتییە لە شارى سلێمانى، بەڵام لەبنەڕەتدا تابلۆکە بۆ گەشت و سەفەرکردن کراوە و بۆ جوانی نیە".
هاوکات کاتێک کەسێک دەیەوێت گەشت بکات، هاتووچۆ رێکارى خۆى دەگرێتەبەر بۆ راییکردنى مامەڵەى هاوڵاتیان، لەبەر ئەوەشە چێکى مۆڵەتى شۆفێری و پاسپۆرتەکەى دەکرێت کەبەسەر نەچووبێت، ئەمەش بۆ خزمەت و بەرژەوەندى خودى شۆفێرە، بۆ ئەوەى توشى کێشەیەک نەبێت لە وڵاتێکى دیکە.
وتەبێژى راگەیاندنى هاتووچۆى سلێمانى ئاماژەی بەوەشکرد، لەکاتى گۆڕینى مۆڵەتى شۆفێرى لە تایبەتەوە بۆ گشتى تەنیا تاقیکردنەوەى پراکتیکى پێدەکرێت.